總統變做小學生

■ 李勤岸

古代中國ê文字獄是皇帝k人ê文字故意曲解，然後k人掠[liah，抓]起來關，關t監牢內底；當今「中」華民「國」ê文字獄抵好倒反—人k總統ê話掠包，然後k伊關t監牢外口。關t監牢外口嘛是teh h人關。假使若是開嘴講話，逐句話攏會h人khi空[找碴]，三講四著，講話無自由kám 是toh親像teh坐監？講台語h人講「衰小」是歹聽話，是lah-sap話；講華語嘛 ho 人講成語用著， 講「罄竹難書」是用t負面ê，總統竟然講「志工的貢獻罄竹難書」。連教育部長嘛ài被質詢， tioh引經據典來解說，然後連行政院長嘛ài發表意見，看部長按呢解說是是有「硬拗」。

這根本就是「白痴造句法」ê延伸，是文言文戰線ê延伸mah！你看hiah-ê拍手kám有換人？無ah，只不過小學生是換總統、部長、院長而已。中國文言文老師兼考官m 是hit批人。總統ho人當做小學生來考，考伊ê中文作文能力，「恁看，阿扁仔ê白痴造句，連總統ê中文都有問題，台語都無水準，所以中國語文時數ài 增加，文言文ài加強。 總講一句，台灣ê中國化ài koh強化。」

當咱ê總統變做小學生teh h人考中國文言文ê 時陣，東歐南斯拉夫聯盟ê蒙特內哥羅透過公投獨立ah！新獨立ê蒙特內哥羅國報紙ê頭版新聞寫講：「阮有家己ê國家ah！」咱ê報紙、電視攏無報這個消息。

我t中國旅美異議作家曹長青寫ê專欄讀著ê時，知甚麼原因，目屎隨lìn [滾] 落來。

（作者為詩人、世界台灣母語聯盟總召集人，用聽ê請上網http：//khinhuann.taibun.tw/ ）