台灣翠青

■ 林美雪

佇戒嚴時代，濟濟海外e台灣人，未當返來家己e故鄉－台灣，所以in時常唱一首海外e「國歌」－「黃昏e故鄉」。解嚴了後，政治環境改變，台灣人家己做總統，濟濟海外e台灣人會當返來家己e故鄉－台灣啊，in開始唱選舉時e「國歌」－「阿輝伯」、「母親e名叫台灣」、 「伊是咱e寶貝」。到二○○六年，現此時台灣人無一首共同e歌；一首感動e歌。因為咱?是（不是）一個正常e國家，所以咱無國歌通唱。

M閣（不過）上帝疼咱台灣。有一首「地下國歌」卻時常佇關心台灣e人e嘴teh傳唱，這首就是鄭兒玉牧師佇一九九三年寫e「台灣翠青」，由蕭泰然先生作曲。歌詞是：

太平洋西南海邊 美麗島台灣翠青

早前受外邦統治 建國今在出頭天

共和國憲法的基礎 四族群平等相協助

人類文化世界和平 國民向前貢獻才能

有翻譯做四種族群e語言，包括台語、阿美語、客語kap（和）中文。Ma有國際e朋友翻做英文kap日文。

我一直有一個夢，佇什麼時陣才會當大聲唱咱台灣e國歌，是一首真正屬於台灣家己國家e國歌。有一工，咱四族群若會當大聲唱出「台灣翠青」，若按呢，台灣才是真正出頭天。（作者為台語兼任教師）