替別人想

■ 林仙龍

若是身體欠安，朋友有時會聊聊兒講（la1-la1-a2-kong2：開玩笑的說）：「身體是你的，也是朋友的，請你替朋友好好保重身體，趕緊好起來。」

此種講法，若像少許（sio2-khoa2：稍微）奇怪，大概是聊天話（la1-thian1-oe7：玩笑話）的關係，不過若深入加想，不單講得誠好，也有誠深的道理。

事實上，「替別人想」此四字，會當講是做人的根本道理，而且是大家攏知的根本道理，雖然焉爾，未曉替別人想的人四界攏是，實在予人誠感慨。

若會曉替家己的小弟想，佇台北市長國民黨黨內初選的時辰（si5-chun7：時候），馬以南女士就蔑（be7：不會）公開獨獨支持葉金川，因為焉爾，會予馬英九佇國民黨內不好做人。

若會曉替家己的親家門戶想，佇台開猶更是水餃股票的時辰，簡水綿女士就蔑大手筆買入五千外張的台開股票，大趁（than3：賺取）幾多千萬，因為焉爾，會予第一家庭遭受國人的批評。

若會曉替家己的翁婿想，佇六冬來的此段時間，第一夫人就蔑出入股市，因為焉爾，在野黨就有充分的理由來批評執政的陳水扁總統，害陳水扁總統滿面全土灰。

其實，替別人想就是替家己想，咱若了解此個道理，而且確實去做，咱的國家社會一定更加和諧。

（作者為台語文字工作者）