母語加一節

■ 黃元興

四月二十左右，咱馬市長看著學生囝仔e國語水準落坑（衰退），交代教育局噯增加國語授課時數，減少母語跟英語時數，即款代誌，互母語教學界真大e不滿，教育局姑不二衷（不得已）佇五月上旬，決定小學每禮拜增加一節國語課，另外撥四千萬箍（元）來支付鐘點費安呢甡（這樣子）。

母語一禮拜嘛才一節爾爾（而已），閣再減叨攏無矣，國語原本有七節，增加一節，效果嘛無到佗位（作用不明顯），目前是電腦時代，學生囝仔逐工拍電腦，定著（當然會）噲礙著國語跟漢字e水準，「不必太苛責」啦！毋閣呢，母語生態衰退，互人欺侮到偆（剩）一節爾，這對族群七八成勞苦大眾，做牛做馬e納稅人，有所不公。

即幾年來，原本馬市長嘛是對母語相當e尊重，譬如講捷運廣播台、客語，大學生台語辯論比賽，幼稚園母語教學…攏是互人謳咾（稱讚）e政績，目前「增加國語，減少母語」無定著是（很可能是）一時口誤爾，佇茲（此地）咱誠懇建議市長先生，「國語每週增加一節，母語也要增加一節」，族群中間互相尊重，逐傢誠意食水甜，無論國語母語，平平是中華文化，攏噯疼惜叨著（就是）。（作者為台北市台語寫作學會召集人）