台文非中文

■ 普拉雷．阿炎

台灣羅馬字是「音素」文字，只需要少少e字母，就可以描寫所有e語音。中文是「詞素」文字，要學很多e「字」（詞素音節符號），才有才調閱讀書寫。音素文字是世界上最普遍e書寫系統。

台灣原底是南島語族。自一六二四年荷蘭人來到台灣以後，經過西班牙、清國、英國、美國、加拿大、日本kap中國人e läm-chham（混雜）。所以，台語絕對呣是中國語，又閣kap中國語有相當e精差（差異）。中文絕斷無才調好好表示台灣語文kap文化。

荷蘭人佇十七世紀用羅馬字為台灣人創造台灣文字（Siraya文）。 一八六五年以後，英美e傳道人來台灣傳道，用羅馬字陸續寫出Hö-ló、客家kap各族原住民e文字。斯當時羅馬字成作民間通用e文字。漢字因為書寫e困難，只有讀過漢學堂少數e漢學a仙會曉使用na-tiann（而已）。除了聖經kap福音資料，台灣文學家就有相當多用羅馬字書寫e著作。一八八五年巴克禮牧師發行完全用羅馬字書寫e報紙「台南府城教會報」（「台灣教會公報」e前身），是台灣第一份報紙閣是台語e報紙。一九一七年有英國人戴仁壽醫生用羅馬字所寫e醫學教科書「內外科看護學」。漢字e醫學教材佇六○年後e七○年代才有人寫出來。

（作者為西拉雅族、台灣羅馬字協會監事）