向百姓挖錢

■ 林仙龍

有一項代誌一直予人索無蹤（sa1-bo5-chang2：摸不著頭緒），健保費不是所得稅，為啥麼合所得有關，所得若多，健保費就繳多，所得若少，健保費就繳少。而且不管你健保費繳多繳少，發病（phoah4-peN7：生病）看醫生，待遇一律相仝，一時間，咱遂無法度體會健保費繳多繳少的實質意義？

健保了錢（liau2-chiN5：虧本）已經幾多冬矣，問題有可能出諸病院，也有可能出諸醫生，益加有可能出諸醫藥，咱若問健保局：「問題出諸何位？」健保局一定搖頭，講伊也不知，主管單位都不知啦，咱一般百姓更加無可能知。

不過有一點，大家絕對攏知，就是健保一孔烏（lang1-lang1 ：又黑又深），問題一大堆，兇手絕對不是咱一般百姓，今行政院不欲積極去尋出健保虧損的兇手，了錢就尋老百姓出主意（急讀成chhut4-chui2：開刀），想欲用老百姓辛辛苦苦的流汗錢，去填（thun7）健保的破孔，咱用腳頭盂（kha1-thau5-u1：膝蓋）想也知，這哪有可能會成功，行政院此種無負責任的做法，不單無法度解決問題，恐驚顛倒破孔愈補愈大孔，代誌愈舞愈著力（chiah8-lat8：吃力），屆時衰小（soe1-siau5：倒楣）的也是老百姓，好康的大概也是大病院，敢講您攏無看到今的大病院一間比一間較大，設備一間比一間較好？

更再講，無欲解決問題，僅單會曉向老百姓挖錢，此種官，誰未曉做？（作者是台語文字工作者）