文雅ê台語

■ 高英男

佇有印象中，台語互一般人ê感覺就是粗魯、俗閣有力。聽著人講台語抑是唱台語歌，腦海中第一ê反應就是「無水準！」台語互人看做是一寡呣成人teh講ê語言。

呣閣，有按呢ê感覺、會按呢想ê人，我會凍講，這是你對台語文本身無完全去了解、探討，呣才會產生此款ê誤解。其實，台語文本身是一種真文雅、真精密ê語言。簡單譬喻：華語叫「太太or老婆」，咱ê台語講「牽手or婦仁人」互人聽起來感覺真燒絡、真貼（tah）心；華語講「火車誤『點』」，咱ê台語講「火車慢『分』」，慢一分鐘就算是delay啊！對按呢知，精密閣文雅，這就是咱ê母語美ê所在。

昨暗，佇電視頂面看著阿扁總統人佇國外開記者會，面對濟濟ê記者朋友，可能是一時ê激動，佇無注意ê中間去講一句：「我實在真『衰小』」此句話。個人感覺，佇國際媒體面頭前，阿扁總統講此句話實在真無妥當，嘛真歹聽。

佇遮，欲（beh）誠心建議，請阿扁總統kap咱ê政府官員，咱做伙鬥陣來講文雅ê台語，好呣？（作者為台語文工作者）