中國馬統ê龜腳

■Babuza

馬英九去美國訪問結束轉來，表面上看起來真風神（風光），事實是中國馬統ê龜腳攏總so出來（露出馬腳）啦！

佇哈佛大學演講，一開始就強調伊是Chairman Ma（馬主席），m是Chairman Mao（毛主席）；這就那像我強調講我是陳水邊，m是陳水扁！恁當然了解我beh講甚物！進前佇國內嘛bat講希望國民黨青年團會當培養出一ê胡錦濤。胡錦濤當年足殘忍鎮壓Tibet（西藏），m知thai死（殺死）外濟人！我若想到遮就歸ê身軀起kalun-sun（寒顫）、起雞母皮koh（又）phih-phih-chhoah（嚇得要死）！抵接國民黨主席ê時，強調國民黨ê政策是終極統一（eventualgoal is reunification），後來hou連戰罵一下緊換話講尊重台灣人ê意見，不過國民黨反對台灣獨立！按呢，若是有一日大多數ê台灣人贊成獨立，國民黨就ai（需要）趕緊搬轉去唐山準備「反攻復台」？莫怪伊嘛有講beh去中國組國民黨！koh承認蘇起大人創造ê「九二共識」！上ham（離譜）ê代誌是伊講「一中就是中華民國」！頂遍連佇伊家己ê管區─台北市體育場嘛反對人佇場內gia（舉）「一中就是中華民國」ê國旗！因為hia有真正 一中就是中華人民共和國。這，若m是精神錯亂就是刁工（故意）欺騙台灣人！即款人beh來做台灣總統？

上尾一項，咱即馬才知影in（他的）查某囝ê名號做馬唯中，意思就是馬英九心內干單有中國若定！噯！即款人建議伊去菜市仔排擔仔專心賣「中國牌馬桶」好啦！（作者為彰化縣平埔族囝孫）