遊戲規則

■楊允言

會記得二十冬前，戒嚴時期有一本黨外雜誌teh討論台灣政治情勢，講一句ho（讓）筆者印象chia.（很）深e話：「用in e規則，sng（玩） in e把戲，台灣絕對輸輸去。」二十冬後，這句話猶原（仍然）真有道理。

咱受中國觀念e教育，in講：「東夷、西戎、南蠻、北狄」，中原人是人，其他所在e，m是野獸to是蟲thoa，台灣ti南peng（邊），台灣人是蟲thoa m是人。這會tang（可以） ho咱koh-khah（更加）了解，是按怎中國人來台灣做總統，霸佔土地起家己e行館是理所當然，台灣人做總統，裝潢公家宿舍叫做討債（浪費）；阿九兄掛台北市長e khanpang（招牌）出國講五四三該當然，阿扁出國beh突破外交困境ho in罵kah無一te好；國民黨e政商勾結是促進經濟發展，民進黨執政ho in講舞phai（壞）經濟，m-koh（不過） 2005年ho世界經濟論壇評估是全球成長競爭力第五名，後來theh（拿）無到國民黨千分之一e政治獻金，soah（卻）變做是動搖國本。國民黨內部kang款（相同），選黨主席看台灣人無起，選台北市長猶原是按呢。

咱m-thang boe記（忘記），咱iah-koh（還）繼續用in e語言文字teh生活、思考，這ma是另外一款形式e「用in e規則，sng in e把戲」。改變習慣chia.困難，m-koh，咱kam（難道） beh（要）跳入這個ho台灣人永遠boe出頭天e輪迴？ Tak家（大家）有必要認真思考這個問題。

（用聽e請上網http://LT.taibun.tw）（作者為大漢技術學院資訊工程系助理教授）