立法院e悲哀

■普拉雷．阿炎

二○○○年五月二十日阿扁a做總統以後，立法院就變成做戲e戲台，呣是國會。尚代先，國民黨呣願失去執政e狀況，也無beh認同這個事實。會期呣好好a審查議案，尤其民生議案及政府機關e預算。會期中若呣是提出一寡a五四三e議題，就是相拍相罵相嚷。會期結束才來加班；呣閣也無甚麼成績。這種代誌是一日比一日較嚴重，一年比一年較ho.人看袂過心（看不過去）。

領咱e稅金錢，呣但無beh替咱做代誌，反倒轉常常侮辱多數人選出來e總統。尤其是今年，有彼囉hong（被）判刑e立委及hong掃出黨門e人為著選舉前beh製造新聞，若童乩起童烏白爆料。聽著風聲，鼻著臭味就若胡蠅蚊a phit-phok（亂）飛。先爆料才來尋證據。這種情形若親像白色恐怖「寧願冤枉九十九人，也呣放過一人」。青瞑雞啄著一尾蟲，隨時展威chheng-gia-gia（出風頭）。

閣較ho.咱peh-pak（傷心） e是，為著「直航條款」甘願犧牲所有e預算。雨期風颱來ah。有人講，大水會跳過lang過袂淹泛藍e。所以「治水條例特別預算案」請放一邊。咱大家攏知，佇國民黨時代無人敢講e代誌，二○○○年以後因為言論自由無閣再受限制。邱毅家己想看mai leh。北京大學是按怎拒絕汝去講新聞自由e講題？（作者為西拉雅族、台灣羅馬字協會監事）