母語人權

■李勤岸

舊年10月客委會主委李永得ti立法院報告e時，使用伊e母語Hakkafa，結果ho立委罵講是「自卑的表現」。

總統「向人民報告」大部分使用伊e母語Holo話，真濟人o-lo伊「表現出自信」。不過koh khah濟人ka批評，講伊「操弄族群」。

到底講母語是自卑e表現抑是自信e表現？客家人m敢講客語，甚至m敢承認家己是 Hakkagin，ho家己變做隱形人，ho客語變做消音e語言，按呢是自卑抑是自信？

講母語m-na是基本人權，koh是民主國家上起碼e言論自由。若是無講母語e自由，咱beh按怎好膽講咱是一個有言論自由e國家？

台灣e母語復振一直攏無甚麼起色，其中有一個真重要e因素，就是咱欠缺有自信肯講母語e政治領袖。咱檯面上e政治人物，面對媒體攏講真無標準e台灣華語。按呢做，一方面ho中國人看無起，另一方面ma無法度一百pha傳情達意，mai講beh koh有才調講到雄辯e地步。雄辯e能力是政治人物e武功，無beh使用母語演講，就是自廢武功。

坦桑尼亞獨立前，in e政治領袖Nyerere堅持使用in非洲人e母語Swahili，ti任何公開場合伊攏講Swahili，準講全場e 人攏使用當時通行e殖民語英語，伊ma真自信講in e母語。坦桑尼亞獨立以後，會tang無繼續使用殖民語，只要是因為in有出現這款忠實母語、有文化自信e政治領袖。

印度e第一任總統甘地ti爭取獨立e時，ti競選總統e時，攏使用印度e母語Hindi，無beh使用英語。伊講：咱若無beh去除英語，到時咱準講獨立ah只不過ma是「無英國人e英國統治」。

Ah咱suah顛倒反對咱e總統講伊e母語？（作者為詩人、世界台灣母語聯盟總召集人，用聽e請上網 http://khinhuann.taibun.tw/）