雪山磅空

■ 高英男

有五十八個大大小小ê磅空（隧道）串連，長度將近十三公里，甚至因為施工ê困難度，佇大英百科全書排有著等ê雪山磅空，佇眾人ê期待，經過十五年ê施工，總算通車。原本台北到蘇澳ê路程ài三點鐘，chit-má（現在）呣免，用四十五分鐘就有夠。呣若giú（拉）倚東、西ê距離，koh-khah帶動宜蘭地區ê繁榮。

佇起造ê過程，一直承受壓力、尚著磨（辛苦）ê，就是為著chit條高速公路恬恬仔（默默的）付出ê工作人員。In日亦操、暝亦拼。除去面對技術上ê問題，koh著考慮環保、水源污染、生態保育等等ê難題。雖罔有濟濟ê塞礙kap阻擋，呣閣，每一個工作人員攏功夫盡展，一個一個真有耐心去克服。

通車啊！大家ka磅空擠到是滇-塞-塞（tinn-that-that；塞爆），有ê人心適（好玩），有ê人去探路草。佇歡喜東、西交通會凍愈來愈利便ê同時，咱嘛ài感謝chit群奉獻家己心力ê工作人員。In用家己ê血kap汗捏造chiah ê每一寸土、每一塊石；拋（phoe）命來改寫台灣ê歷史，亦傳成了蔣渭水先生為台灣民主打拼ê腳跡。當咱享受chiah ê利便、成果ê時，是不是亦互in一個熱情ê掌聲。