難兄難弟

■ 普拉雷．阿炎

Sai-kong-á siū-poe ê意思接近華語ê「難兄難弟」，童乩桌頭類似華語「唱雙簧」。李濤及宋楚瑜若親像這兩種意思ê lām-chham（混合）。

1999年921大地動後，李濤佇災區有辦幾若場「2100全民開講」。針對地動後，政府ê危機處理及民間ê反應有真鬧熱ê場面。也製造一段真懸ê收視率。因為筆者夫婦佇地動後去災區做義工，將近有3年ê時間。照筆者深入了解及當地人ê反應，當時參加現場ê民眾大部份攏呣是受災人。若呣是外地人就是無受著災難ê當地人。災民講，in（他們）整頓家己ê茨及找尋生活所需要ê物件就無時間，哪有彼loh美國時間。同彼ê時陣，宋楚瑜及伊ê柱á腳佇災區走透透。In放出風聲，另外兩ê總統候選人A錢ê功夫比伊較厲害。當地也流傳一ê神話，設使宋--ê若猶是省長就袂發生大地動。

今á日宋--ê beh選台北市長，又閣teh起童大聲喝beh罷免多數人選出來ê陳總統。另外一方面為著beh擦消最近閣提出來ê興票案。免得臭頭phí-á閣予人khàng kah爛kô．-kô．。

宋--ê ah，風颱雨期kám ē-tit-thang等待罷免陳總統及卸任正副總統禮遇條例修正草案處理了後才來？聽講李濤佇「全民開講」節目中「聞雞起舞」。真是一對sai-kong-á siū-poe。台灣人，請趕緊買竹排á準備淹大水通好用。

（作者為西拉雅族、台灣羅馬字協會監事）