老大人誰照顧

■ 普拉雷．阿炎

個人ê綜合所得稅已經報了ah。雖罔今年有小可á改變。譬如講翁á某合做夥報，以前是無到單身ê兩倍，即má（現在）是兩倍。呣閣猶原iáu有無kài合理ê項目。

舉一個例，申報人ê序大人（尊親屬）未滿六十歲年收入超過七萬四，就袂用得（不能）列作被扶養人。這個意思是呣是講，咱ê老父或是老母只要伊每個月趁有六千兩百箍，咱就無義務，-ng-tit呣免養飼伊ah。莫怪！新聞報紙時常會得通看著老大人teh告囝兒放撒。憑良心講，一天beh趁兩百箍，倒佇茨nih是無法度趁會著。

咱來算看mi leh，伊一天要開外濟錢。出門做工坐市公車最少二十四箍。早頓一碗豆奶及一粒包á最少二十箍。中晝頓及暗頓兩個便當一百箍。一天千五cc ê礦泉水兩罐四十箍。總共一百八十四箍，後手猶剩十六箍。無錢點電火，十六箍買兩支（ ）條可能有夠。無自來水，身軀只好去公共便所邊洗無錢ê。呣閣愛細膩，袂用得去hông（被人）看著。偷用公家ê水是犯法ê，會hông掠去關。因為囝兒ê收入siun懸（太高），無法度領著中低收入戶ê補貼。老人年金猶無資格。無健保，無資格破病。衫á褲，路邊ê舊衫回收箱罔夾看會著無。

老孤khut（老孤獨）！Siâng（誰）叫汝無愛較老leh！