不貪才是寶

■ 林仙龍

古早，有人提一塊寶玉欲送予宋國的大夫子罕，子罕無欲接受。

獻玉的人講：「這是真正的寶，所以我纔敢獻予你。」

子罕講：「焉爾上好，你將寶玉當作寶，我將『不貪』當作寶，我若罔（bang2：不要）接受你的寶玉，你合我的寶就蔑破損（be7-phah4-sng2：不會破壞）去，所以請你將寶玉提轉去（the5-tng2-khi3：拿回去）。」

這是左傳內面的故事，它欲講的是：做官應該清廉自守，不當隨便接受別人的物件。

幾千冬後的今日，咱看到已經享受榮華富貴的官宦家庭，猶更貪圖別人的名錶名筆、婚紗禮服、珍珠鑽石等等，客氣講，講他小貪（siau2-tham1：貪小便宜），應該無人會反對，若無細膩講，講他奢華（chhia1-hoa1），應該也無人會懷疑。

小貪也是貪，人講百姓小貪匿（nng3：關禁）雞籠，官員小貪變害蟲，「貪」字大家攏應該避免，尤其公職人員，因為它是貪污政治的源頭。咱今看到當權者小貪，連古早宋國的一個小官都不如，實在令人感嘆。

這予人想起以前蔣經國先生的做法，他視察民間的時辰，不管是食（chiah8：吃）路邊擔仔的一碗麵，抑是涼水擔（liang5-chui2-taN3：冷飲攤）的一杯紅茶，侍衛人員一定付錢予東家（thau5-ke1：老闆），一仙五釐都蔑失覺察（be7-sit4-kak4-chhat4：不會疏忽），此種蔑小貪，蔑奢華，平平實實的做法，實在值得阿諛（o1-lo2：讚美）。

（作者是台語文字工作者）