呣通浪費稅金

■ 高英男

Bat（曾）看過一ê笑話講：有一ê漢草真好、力頭真飽ê拳頭師傅，佇菜市仔口打拳賣膏藥。伊表演一步絕招，就是用手尾力擠檸檬汁。歸粒檸檬是擠到乾-乾-乾，無留kah半滴。伊真hiau-pai（囂掰），現當場嗆聲，若是有人有才調koh擠一滴汁出來，伊無條件奉送一千元。一寡高強大漢ê民眾攏相爭去試，想beh賺一千元。結果，無法度就是無法度。此時，有一ê瘦koh薄板ê老伙仔喝聲輸贏，無幾下，馬上koh擠歸半杯ê汁出來。拳頭師傅甘拜下風，問此ê老伙仔是teh做啥--ê，老伙仔講「我以早佇國稅局teh上班。」

高雄ê地標「愛河」，佇市民ê期待kap政府ê用心計較，此幾年來有真大ê改變，變kah足美--ê。會記得三月份，去愛河ê時，tú好看著有工人佇遐（hia）做綠化ê工作，種花栽。確實，有五花十色ê花chng-thann（妝飾），愛河看起來愈來愈活氣。呣知是天氣siunn熱抑是無注意，五日節去愛河看划龍船ê時，一半khah加（ke） ê花攏已經枯焦。納稅是人民一種真好ê義務，政府會凍用chiah ê稅金來建設咱ê家園。呣閣，嘛希望政府要有齊全ê計劃，呣通浪費，呣通辜負人民此ê真好ê義務。