軟索仔牽豬哥

■ 陳柏壽

今仔日美國通商部副代表來台灣尋阿扁仔，大家真期待這六年來美國官員的最高階，是欲來甲咱簽雙邊合作的關係。無想到伊來是欲勸咱增加及中國的經濟合作。伊講咱的經濟才有法度轉好。咱攏知影：這個藥方是台灣致死的藥方。

台灣若死，美國人無甚麼關係，死是台灣人。美國人一向對外宣言講：「不准用武力統一」。意思是講：用經濟統一、媒介統一、教育統一，用其他任何步數來統，攏總可以。咱用遠目來看，這是欲互台灣無命的攻勢。美國人用台灣作棋仔及中國põah-kiáu（賭博）真正是不知影死活：台灣若死，美國嘛活啦。

中國功夫最毒的一步叫作「不戰而屈人之兵」。知影用硬的，台灣投降；但是若是用軟的：用文化、大眾媒體、教育、心理、語言、經濟，用「軟索仔」來牽豬哥，就這隻台灣豬哥會戇憨乖乖隨伊行。

美國今仔日掌管世界的四大力量是教育、金融、資訊及軍事。但是佇軟索牽豬哥這步中國功夫，伊過中國人。

今仔日美國猶憨憨仔喊「一個中國」，實在是去互中國軟索仔牽去啦！

佳哉，台灣人戇豬哥無多，台灣魂猶活佇千千萬萬台灣同胞的心內，「台灣魂」是叫作「不屈之魂」、「亞西亞孤兒之魂」、「愛拚才會贏之魂」、「韌命無認輸之魂」、「咱欲出頭天之魂」。台灣魂藏佇台灣土地草根下面，及台灣的生命同存，及台灣老母同活。

台灣歷史以來受中國功夫之害真深，一步一步牽咱去安樂死。咱台灣上下全國人民著緊警醒起來，緊緊建設咱的文化、社會、語言、意識。這是所有戰鬥中第一艱難、第一無看，但是是第一重要的戰鬥。

（作者為台灣基督長老教會牧師）