九分看家己

■ 高英男

食晝（午餐）ê時陣，查某子問我，爸爸：「藍色」、「綠色」ê英語beh按怎講？

「Blue」kap「Green」啊！

「…喔…！」查某子ê回應，袂kài蔥脆（乾脆），若親像半桶水，知頭呣知尾ê款。

「呣是啦！藍是KMT，綠是DPP。」後生（兒子）喝（hoah）聲講。

「…？」Ti（何）時，我ê子亦會kap我lak痟話（鬼扯）啊！這亦莫怪，tak天看媒體強力大放送，民意代表、專家學者講到嘴角全pho（泡沫），免講連囝仔嘛有樣看樣。

十九世紀英國ê歷史哲學家Lord Acton講：「權力互人腐敗，絕對權力，絕對腐敗。」因為「權」kap「利」迷惑，互今仔日ê民主政治已經oai-chhoah（變質）去。真正ê民主政治，應該是實現理想、服務，呣是beh互相攻擊，koh-khah勿得濫糝舞。李遠哲先生呼籲「止謗莫如自修」互我想起聖經講ê一句話：「著恢復起頭ê疼心。著回想你墜落去到甚麼程度。著悔改，來做你起頭所做ê代誌。」期待大家攏會凍有「一分看別人，九分看家己」ê曉悟，chhui-sak（鞭策）家己愈來愈精英。「藍」、「綠」，不二過是一個名詞若定，民主政治beh按怎發展？就看咱撒甚麼款種子、留互後代甚麼款好樣相（好榜樣）。當咱同心為王建民ê sinker（快速下沉球）加油ê時，是呣是亦用共款ê心情為台灣加油！

（作者為台文工作者）