語文生態多樣化

■ 李勤岸

昨昏（tsa-hng，昨天）開始，連續三工，七月七日至九日，第十一屆世界台語文化營tī綠島舉行。各地報名ê百外個學員，beh kap語言、文學、生態方面ê學者、作家做夥體驗、探討台灣ê生態kap語言多樣ê文化面貌。

世界台語文化營是十一冬前tī美國ê休士頓開始ê，當時叫做「北美洲台語文夏令會」。發起人是前台獨聯盟美國本部主席蔡正隆博士。伊tī性命尾期大大體會著母語文化ê重要，曉悟家己竟然是母語ê文盲，就謙卑學習台語文，koh發起台語文夏令會，聚集世界各地ê台語文專家，每年熱—人 （夏天）選擇一個所在辦營隊，傳播母語文化ê理念。第五屆tī夏威夷決議徙轉來（súa tńg-lâi，回來）台灣舉辦。

第十一屆會選tī綠島，因為綠島ê生態環境保持了上界（siōng-kài， 最）完整，上界多樣性。當然，離開政治ê 糞埽（pùn-sò，垃圾）干擾，會tàng hō 大家耳孔khah清靜，心思khah清明，按呢beh來思考如何重建台灣語文ê多樣性，復振台灣語文生態ê原貌會khah有效率。綠島早前是國民黨政府關政治犯ê所在，tsit-má（現在）咱顛倒toh ài來tsia（這裡）才會tàng得著政治ê清淨！

二○○一年十一月，聯合國教科文組織大會tī巴黎通過《世界文化多樣性宣言》，宣示「文化多樣性是交流、革新kap創作ê源泉，對人類來講，就親像生物對維持物種平衡仝款，是bē-tàng欠缺ê。」並且koh主張「每個人攏應該有權利使用伊所選擇ê語言，特別是用伊家己ê母語來表達家己ê思想，進行創作kap傳播家己ê作品。」

促進語言、文化、生態ê多樣性是當今世界ê主流思潮，咱台灣若beh國際化，beh tī國際舞台kap人khiā起，tioh 應該ùi改善現今ê語言環境，促進台灣語言文化ê多樣性做起。

（作者為詩人、世界台灣母語聯盟總召集人。
用聽ê請上網 ︰http://khinhuann.taibun.tw/）