本土政權是甚物？

■張復聚

甚物是台灣本土政權（政黨）？上少ai有下面3 e必要條件才有資格chhiang（唱）聲：1.對台灣本土puh（發芽）出來--e、抑是已經澈底的（tek）台灣化--e；2.政治主張是「台灣唯一（i-it）」、m是「台灣優先」；3.政策有全面的e思考、詳細e計劃koh有實在、積極teh實踐這e khang-khoe（工作）。

第一項免講ma知，咱無排他條款。第二項咱到chit-ma（現在）long猶無看著。「台灣唯一」表示永遠long是台灣，無第二e可能kap考慮；若是講「台灣優先」，是m是表示可能tiang時（何時）會變做「台灣次要」？第三項ai有包含政治、軍事、教育、經濟、環保…一直到少數（原住民）抑是弱勢（客家kap Ho-lo）e語言kap文化等等e政策。本土政權e任務m是beh滿足少數政治精英、特定族群kap一寡專門teh截（cha.）稻仔尾（不勞而獲）e投機者！koh卡m是干單政治資源重頭（重新）分配若定！應該是beh建立台灣主體性e獨立國家koh有公義e社會。佇遮，除了頂面e任務long會得thang（可以）完成，ho有「台灣認同e逐階層人」long感覺有hong（被人）尊重、long有感受著加拿大少數族群權利學者W.Kymlica講e‘sense of agency’（家己是有路用e人）！

用頂面e標準來論，台灣本土政權猶未出世leh!台灣人，加油！（作者為醫生、台灣南社台灣母語組長）