|
頭人合人頭
■林仙龍
路邊的選舉看板，候選人的身軀邊往往加一個大腳色（kioh4-siau3：人物），以前是李登輝、陳水扁，今咧，是馬英九、謝長廷、姚文智、黃俊英…，候選人經過政治大腳色的推薦合背書，像圈金純（khong1-kim1-sun5：鑲金邊）的寶貝，金光閃閃，行情加若何（合讀成goa7：多麼）好咧。
這合三四十冬前，拜託有頭面的人引頭路（in2-thau5-loo7：找工作），機會較多也較好，道理仝款，咱的政治文化真正有夠台灣味，不過咱也會懷疑，此種政治推薦合背書有若何多（合讀成goa7-che7：多少）意義，萬一候選人無好，抑是以後變壞去，推薦者有啥麼責任無？
此種政治文化有人加叫做「頭人」合「人頭」的政治，也就是派系政治，講較好聽咧，是一群人為著共同的政治理想佇搏拚，講較叵聽（phaiN2-thiaN1：難聽）咧，是一群人為著共同的政治利益來勾結，雖然好黴（ho2-bai2：好壞）處攏有，不過出問題的時辰（si5-chun7：時候），對國家社會抑是政黨政治的傷害誠大。
此遍民進黨佇全代會中投票決定解散派系，這實在是一件了不起的做法，對民進黨長遠的發展有誠正面的意義。
政黨派系，有誠大的成分是政黨和幫派兩種概念的結合，消除幫派的氣氛，政黨纔會更加像政黨，不管民進黨的派系會地下化否，咱先檢驗路邊的選舉看板就好。（作者是台語文字工作者）
|
對本文章發言
友善列印