大聲說客／尋無頭路

■ 陳寧貴

轉去南部鄉下老屋家，發現莊肚鄉親感嘆：新頭路真壞尋，頭擺做等好好介工廠，一下間蓋像發夢樣仔，毋知徙去奈位。聽講像牛賽壢樣，全徙去大陸哩喲！

莊肚介後生，有兜勉強尋到頭路，毋過月俸微薄，佢等又失忒傳統勤儉傳統精神，故所根本就毋罅用，寅食卯糧之下，祇好毋顧將來風險，刷現金卡來補貼，落尾都變成卡奴，老阿爸不時收到法院通知繳錢信，火氣大著，續毋知愛仰般來罵。

以上係現時發生在南部鄉村介經濟情況縮影，其根源來自鄉村傳統產業不敵大陸磁吸效應，造成大量外移，頭擺在鄉村愛做毋驚無頭路，現下係煞猛無定著尋有頭路。有鄉親講：下二擺這兜後生無成要過大陸尋頭路係麼？真尷尬哪，這同我等開台祖無係行相反介路麼？

愐起台海兩岸政經政策，適「戒急用忍」到「有效管理」再到「積極管理」似乎並沒法度改變台灣政經大箍（領導者）親中傾中趨勢，台灣雖然財源滾滾大部份都滾去對岸。最近經續會提及「包機直航常態化」、「放寬赴中國投資四十％上限」及「本國銀行登陸」等開放政策，係毋係我等自家大憨牯樣開一條「青藏鐵路」，加速將台灣政經利益輸送到對岸？ （作者為客家詩人）