海翁出航／林一方

■ 李勤岸

林一方最近開始籌備beh翕（hip，拍攝）〈槍口下ê冤魂〉。連本（liân-pún，本來） 預算明年228 hit工beh完成，thang獻 hō 台灣人，因為真濟台灣人連為甚麼228 hit工beh放假嘛m̄知。真拄好，這個時陣，桃園法院以舊年年底選舉hit陣伊拍ê「非常光碟」違反選罷法，判伊一年八個月。這是另外一款ê恐嚇。伊講：「無管如何我一定會完成這部電影，我在意ê是是非烏白，我beh還台灣人一個公道！」

為著beh突破統派tùi媒體ê壟斷，林一方幾冬前kap幾個少年人創辦網路電視「台灣聯通網」，希望會tàng替台灣人開出一個言論空間，可惜並無成功。

舊年伊koh投入電影製作，拍出一部有水準ê〈南方記事之浮世光影〉，替日本時代ê台灣畫家黃清埕寫傳。黃清埕是澎湖人，留日學畫，完成學業轉來台灣ê時，伊坐ê hit隻客船「高千穗丸」hō͘美軍炸沉。死ê 時才31歲。林一方為著講究寫實，要求主角講澎湖腔ê台語，劇本用漢羅書寫，這是台灣第一部使用漢羅台語文書寫ê劇本。

台灣真需要這款台灣人觀點，描寫台灣人故事ê電影—台灣真需要林一方。台灣真需要有人去突破統派媒體ê恐怖統治—台灣真需要林一方。台灣需要學猶太人一部接一部一直拍大屠殺ê電影，台灣真需要有人完成規系列ê「228血淚史」—台灣koh khah需要林一方。

台灣需要足濟足濟個ê林一方。（作者為詩人、世界台灣母語聯盟總召集人；用聽ê請上網http：//khinhoaN.taibun.tw/）