鑼聲若響／道歉 認錯 改過

■ 林仙龍

屆今，咱猶看著誠多人銃頭（chheng3-thau5：槍口）向趙建銘，批評兼建議，無分藍綠，有人叫他剃光頭去廟寺懺悔，將一寡慾望攏空掉；有人叫他將身軀邊所有高貴的物件攏抌掉（tim3-tiau7：丟掉），將奢華的個性改掉；有人叫他舉辦義診，造功德贖罪孽；有人叫他吐出得到的不義之財，未當僅單一家富，台灣大家一路號（hau2：哭）；甚至也有人叫他合陳幸妤停婚，切斷裙環仔（kun5-khian1-a2：裙帶）關係，一人做事一人當，罔（bang3：不要）害著別人。

其實，趙建銘佇交保後第一時間，就已經講：「我佇茲向全國的社會大眾道歉。」敢講焉爾猶更無夠？台開案今已經進入司法程序矣，台灣是民主社會，尊重司法是基本精神，咱為何若（ui7-a1-na2：為什麼）未當靜靜聽候司法審判的結果？

當然社會大眾會當表示家己的看法，對趙建銘的不滿也好，對司法的無信任也好，不過，不管是叫趙建銘剃光頭、改掉奢華個性、義診、吐錢出來，抑是停婚，不如佇他口頭道歉了後，鼓勵他提出實際的行動，佇今後司法審判的過程中，勇敢認錯，還全國百姓一個公道，也還第一家庭一個公道。

當然佇道歉、認錯了後，更加重要的，就是改過，我相信這纔是咱對趙建銘共同的盼望。（作者為台語文字工作者）