手寫母語／打通亭仔腳

■ 高英男

透中晝親像針teh鑿ê日頭kap下晡時雄雄（忽然間）嘩一陣ê西北雨，是天公伯仔賞賜咱台灣熱天時尚有名ê二種特色。佇別ê所在想beh享受chit款尚天然ê五星級三溫暖，啖（tam）一下仔chit種kap雨走相迮（jiok）、kap日頭匿相尋（bih-sio-chhoe） ê滋味，開錢koh無一定買會著。見若beh匿（bih）雨抑是閃日頭，大家第一個反應就是尋（chhoe）亭仔腳。以往，beh尋一個亭仔腳歇一下，是比登天koh-khah難。更加呣免講，行亭仔腳無法度一路暢到底，著ài行出行入、繞來繞去啊！

高雄市政府為著beh改善用路人行ê環境，提升在地人生活ê品質，拚治安，真積極teh推動改變市民佔用亭仔腳ê習慣，實施「打通亭仔腳」計畫。最近，佇無按算ê中間，一寡原本chhai佇亭仔腳營業ê涼水攤、麵攤、路邊攤仔攏已經漸漸徙（sóa）走或是ka亭仔腳讓出來啊！呣若互過路人真方便行，歸ê市容看起來嘛感覺ke足有精神。心內趒跳（tiô-thiàu；雀躍），真歡喜看著高雄人ê努力！相信未來ê「打狗」，無閣再互人khau洗（諷刺）是沙漠，顛倒是人人意愛ê觀光都市。 （作者為台文工作者）