將心比心

■陳寧貴

管家阿卿嫂，分人惡意亂罵係台灣垃圾，又被質疑佢係無係有買台開股票賺錢。到尾，阿卿嫂在大批媒體記者前，忍無可忍盡譴反駁：「我做這工作祇不過係換一包薪水，並無做違法事情，汝等做毋得亂糝抹黑我！」

是非恁清楚，假使我在一間公司食頭路，公司頭家做出違法亂紀之事，我無成做得分人講，我同佢同流合污？

阿卿嫂對有藝人，在搞笑節目中模仿佢也盡毋認同。這係台灣民主開放異象，名人分藝人拿來隨便搞笑由來已久，觀眾看到笑哈哈，當事人心頭可能苦哈哈，假使當事人有被羞辱感覺，這種「幽默」就有必要檢討改善，應當避免搞笑成「高山頂項捉湖鰍，無影無跡講到有」，忒過份全民甚至要加入譴責正著（才對 ）。

以上該兜道德上介失誤，都係源自政治上介紛爭，造成台灣人道德感錯亂。汝同我之間，做得政治立場無相同，這係做得公開辯論。毋過是非觀念做毋得混淆，假使混淆，社會安定定著無法度維持，這係最得人驚介社會現象，甚至比政治上介紛爭還過可怕。希望大家將心比心，汝今晡日仰般（怎樣）對待別儕，天光日別儕就會用同樣方式來對待汝。（作者為客家詩人）