民主這條路

■ 李勤岸

看台視ê「台灣民主之路」，感慨萬千。真佩服製作人何康美，會tàng用短短一點鐘ê影片，講出台灣民主這條路ê鹹酸苦tsiáⁿ，值得o-ló、推薦。

台灣ùi外來政權威權ê殖民統治，行到hō 國際認定是完全民主ê國家，確實千辛萬苦。咱若想講連李登輝做到國民黨主席，做到中華民國總統，嘛猶感覺著「台灣人ê悲哀」，咱著了解ah。李登輝ê偉大，是伊tī悲哀ê環境下，竟然有才調運用智慧，行出悲哀，kā台灣tshūa到民主這條路。

現任ê中華民國總統陳水扁應該koh khah會tàng體會著這款ê悲哀。做到總統ah，連任ah，結果逐工攏teh hō 人「欺負」，逐工人都beh叫伊落台。最近甚至連一寡親綠ê人嘛beh叫伊落來。伊這個總統職位，假那紙糊ê，按呢敢無悲哀？

台灣人無家己ê國家， 寄生tiàm外來ê中華民國，koh目睭擘 （peh，用力張開）無金，目睭皮無漿ám（張大眼睛），結果就是悽慘落魄。

民主是咱台灣上寶貴ê資產，咱一定ài珍惜，ài用智慧來維護，用全性命來kā顧hō tiâu。民主這條路無好行，m-thang腳步家己行亂去。這那像二人三腳ê比賽仝款，無管如何咱有一腳是縛做夥ê，若是腳步bē齊，按呢beh行到出頭天ê目標就無可能。咱m-thang因為對敵ê喊huah真大聲，就家己自亂腳步，按呢一定liâm-mi （馬上）khōng腳蹺（khiàu，跌倒），到時hiah-ê喊huah聲攏隨變做笑聲。

（作者為詩人、世界台灣母語聯盟總召集人；用聽ê請上網︰http://khinhuann.taibun.tw/）