台灣自保

■ 陳寧貴

泛綠陣營既經講蓋明白，假使第一家庭涉弊案，請依法辦理，就算阿扁總統涉案也不包庇寬容。

無故泛藍陣營還毋放過，用舖天蓋地「清廉保台」符誥窮追猛打，甚至二實八虛像編故事演肥皂劇，唯一目的就係，要將無明確違法證據介阿扁總統揙下台。

實在講清廉保台之說，既經分人（已經給人）認定係政黨惡鬥，大聲要求別人清廉，故意忽視自家清廉，根本就係詛咒分別人死。愐起連戰兩千零四年競選總統政見，公開承諾要將適人民、日產、國家介黨產，還分國家同人民，結果總統無當選，黨產也無還。馬主席上台後，毋聲毋說黨產遽遽出脫，最近政府加強討還這兜全民財產，國民黨拗蠻講「去告啊！」這種有嘴講別人無嘴講自家，死豬毋驚滾水熝介作風，愛仰般來服人？要知得這毋單淨係（不只是）法律事件，也係有關國家人民介政治事件，到選舉時節，台灣人民定著要分佢付出無法估算介政治代價！

再講到「保台」，泛藍用「凱子軍購」、「美國應當無條件提供軍火保台」介歪理硬拗阻擋，分國際社會誤認台灣連自保意願都無，淨想無付出任何代價，就想分別儕來保護。恁仰（如此）思維之下，台灣要仰般（如何）做一個主權獨立國家？仰般大大方方行入國際社會？（作者為客家詩人）