桐花樹下 台灣客家

■ 陳寧貴

台灣客家，

頭擺二三百年前，

開台祖渡過險惡黑水溝，

咬薑啜醋，開山闢地，

適泥漿肚建立起，

台灣客家，

既經勇敢企出來，

毋係台灣社會隱形人，

乜毋係台灣介人客，

佇這地跡落地生根，

頭頂台灣天，腳踏台灣地，

做得講係頂天立地台灣好漢，

同河洛原新住民共樣，

台灣客家，

愛為台灣前途打拚，

佇「極統納獨」佬「極獨納統」，

兩片莫名其妙鬥法中，

我等愛企奈片？

為了將來子孫好生活，

硬程客家志氣高，

相信我等會算分天斷，

甘願過水毋過橋，

愛同原鄉父老兄弟姊妹講：

愐汝一番又一番，

心肝脫得十二層，

毋故歇久他鄉變故鄉，

註

頭擺：從前

適：從

既經：已經

乜毋係：也不是

企奈片：站哪邊

硬程：剛毅

愐汝：想你

歇久：住久

（作者為客家詩人）

小啟︰「沈默之聲」與「桐花樹下」將屆一年，因版面調整，至本周結束。