假民調

■ 陳寧貴

台灣民調氾濫，又輒常暗含政治操作，一方面挾民意攻擊敵對陣營，一方面順便為自家陣營造勢。這「民」到底係麼介色彩之民？無先分清楚，或者故意混淆，終究以偏概全，失真失德！

故所一邊講，自家介民調係顯現民主聲音，另一邊批評佢係搞弄民粹。

「假民調」得人驚介陰謀佇後背，佢打扮成「全民共識」，製作成蓋像無形飛彈樣仔，堂堂皇皇穿心入耳，受傷介人事痛到欲死，想求救乜發無出聲。

這係台灣亂源之一，在台灣泛藍媒體佔大部份，這兜共色媒體共同做民調發聲，斷真驚天動地，造成人心不安。近年來佢等做介民調顯示台灣政經沉淪，台灣精英走淨淨，唯有大步西進，台灣正能得救，事實敢係恁樣？

近年來台灣人失忒泰半自信心，一大部原因係分這兜假民調影響到，做假民調者形同家賊，客家古老言：「 家賊難防，馱走屋樑」，講介就係這種危機，台灣人應當冷靜下來，對抗這種無日無夜，天羅地網矇騙介假民調，遽遽恢復台灣人，像擔竿樣介強韌生命力！

（作者為客家詩人）