母語kap建國

■張復聚

33屆世界台灣同鄉會年會（7/28~30）佇多倫多召開，有對世界逐所在來e台灣鄉親400外人參加，ma有“哈台派”日本學者發表演講，呼籲咱緊緊建立台灣民族e聲音。

本人受大會邀請去做專題演講“母語kap建國”，主張大家m-thang（不可）koh繼續做母語青暝牛（文盲）、ai注重家己e母語，建立現代、文明、互相尊重、互相欣賞、多元文化主義e邦國，ho台灣成做世界好模樣e文明模範生。咱e鄉親聽了long真認同，ho我足感動。

會中有鄉親問著母語文字化e問題，懷疑漢字lam（併用）白話字（台灣羅馬字）寫母語put-tap put-chhit（不三不四）、甚至認為白話字m是台灣人e文字，咱無應該使用！本人說明：日文ma是漢字lam kana（假名）；越南永過用漢字、即馬long總用羅馬字，ma是寫到sia-sia-kio（很流暢）；西醫、飛機、冷氣、民主、環保等科技、文明觀念ma long m是台灣人原本就有e，為何無人反對？可見long是觀念問題！

koh有人問我啥代be曉（不會）讀家己e母語？我真有耐心ka講原因是母語能力無包含寫kap讀，需要koh去學才e曉；ma報in（他們）台語文雜誌台文通訊e網頁http://www.tgb.org.tw/；若是的確（真正）有心beh學，認真讀幾點鐘就e曉。

經過按呢說明，鄉親long會當理解kap接受，我對母語e未來有真大e信心。（作者為醫生、高雄醫界聯盟會長）