看影開槍

■ 陳寧貴

佇調查局介保證下，國務機要費證人李慧芬千里迢迢適澳洲轉來台灣，為了佢介人身安全，調查局與航警局人員動用三層人牆方式保護，佢隨身帶歸來，兩大箱防水膠膜保護介神秘「旅行箱證物」。喔呵！這棚戲定著精彩可期，分台灣人看到心肝勃勃跳，三魂像要失忒二魂。

這時節，泛藍媒體開始憑空大作文章，講李慧芬比百萬人倒扁還閣厲害，係澳洲霹靂火，係壓倒阿扁總統最尾一支稻草。結果，佇高檢署查黑中心檢察官陳瑞仁開封發現，兩大箱神秘證件，裡肚放介大部份係私人物品，淨有少量發票影本，這兜發票檢調早就掌握到，半息就無麼介神祕，對偵查案情並無實質助益，根本就係一場大烏龍！

毋過，李慧芬開記者會時節講，真正介證件放佇佢介頭那肚，並一再強調佢愛台灣。裡尾又有人出面控訴，佢出手闊綽欠債毋還，李慧芬聽著盡譴回擊：這係白色恐怖！分人看到霧煞煞，毋知要仰般看待佢這擺轉來台灣介真正動機。

有人質疑，佢介真正動機係毋係為了配合倒扁？包括這幾日趙建銘賣巨鑽案，證明係無影無跡介事情，看影開槍介國民黨立委，同樣硬拗係合理懷疑，只要能夠矛頭向扁，就係思想正確，恁樣因人設事，無使半息感覺壞勢。台灣人心行到這種，淨問立場無顧是非信口開河介地步，未來實在分人擔憂。

（作者為客家詩人）