M知ê權利

■ 李勤岸

咱台灣ê閱聽大眾已經變做飼料雞；咱ê媒體已經變做歐羅肥飼料公司；SNG採訪車就是歐羅肥輸送帶。咱若無發起運動來kā媒體制裁，台灣人連鞭就會hō^.人用飼料飼kah變做超重ê肉雞，肥tsut-tsut ê肉雞。

媒體工作者逐不時 （tàk-put-sî，時常）都講in ê工作是beh維護閱聽大眾「知ê權利」。到底大眾需要知影到甚麼程度？大眾kám 無「知ê權利」？

王建民ê棒球成就當然使咱台灣人感覺非常驕傲，所以咱真ài看伊tī球場ê表現；但是咱kám有需要知影伊ê私生活？伊是是細漢就hō^.人io（養）咱kám需要知？建仔真受氣，發表聲明講暫時無beh接受台灣媒體ê採訪。著（tiòh，對！）伊有 hō^.人知ê權利。伊ê個人隱私權受侵犯，伊當然受氣。

陳幸妤雖然是總統ê查某囝，雖然伊ê翁婿舞真大條，但是伊beh搬去叨位 （tó-i，哪裡），盈暗（ing-àm，今晚）beh睏叨位大眾kám有需要知？陳幸妤真受氣kā跟tòe（跟隨）ê記者講：「有點人權好不好？」著！伊有 hō^.人知ê權利，這是人身自由ê基本人權ah！陳幸妤絕對有權利受氣，伊連最起碼ê人權都hō^.媒體侵犯，是按怎bê使（b-sái，不可）受氣？

當然mā有人真ài上媒體，無管報伊啥物攏好，若久無kãā報，伊tióh真鬱卒，緊tshûe（找）tsit-má上流行ê新聞來插一腳，紅目仔鬥鬧熱，伊無管按呢做著著，對伊家己好好，橫直上媒體就爽。這種人就是「暴露狂」。In有暴露狂，媒體mā有暴露狂，但是咱閱聽大眾mā有看ê權利、知ê權利、做飼料雞ê權利！（作者為詩人、世界台灣母語聯盟總召集人；用聽ê請上網︰http：// khinhuann.taibun.tw/）