壞戲拖棚

■ 陳寧貴

一個法治國家，假使人民毋信任司法介調查同（與）裁判，這個國家就無法度風調雨順國泰民安。這種無正常思維效應之下，造成多災多難介阿扁總統，佢適（他自從）上任以來，要罷免佢介聲音一直無斷過，一波波造成族群對立藍綠對決，發展到今，部份泛綠自家人也加入混戰。

事實講，適威權時代轉型到民主時代，阿扁總統輒常提出本土化正名、制憲介「轉型正義」，淪為口號同選舉操作，並無真正認真實行，分泛綠人士相當不滿，加上泛藍無日無夜揠弊案，致使佢親信弊案纏身，甚至延燒第一家庭，阿扁總統面對這兜（這些）強烈鬥爭，既經威信盡失，同下台有麼介兩樣？

現下，毋管係親綠學者、施明德、黃光國擎出介倒扁大旗，到底係毋係有像佢等講介恁風神，全台灣人民都扳開目珠金金看（睜大眼晴在看），毋過佇流血革命虛幻介口號刺激下，必定引起深綠台灣人民忍毋落，盡譴（很憤怒）拿出钁頭柄出來反制，一場社會動亂介火又著起，最才過係麼儕（可憐的是誰）？當然又係一般無辜基層百姓！自認為能夠翻雲覆雨介台灣精英，請三思。

（作者為客家詩人）