變色的冷筍

■ 林仙龍

大文學家蘇東坡講過「無竹令人俗」的話，言下之意，「竹」所代表的意涵和「俗」倒反，竹代表雅氣。

禪宗的公案提到一個和尚掃地，石頭磕（khok8：碰）著掃彗（sau3-se1：竹掃把）柄，磕，一聲，和尚瞬間遂（soah4：結果）開悟，有人講是竹柄空心的關係，佇茲（ti7-chia1：在這裡），竹代表空靈。

大書法家鄭板橋一生愛畫竹，也寫過有關竹的詩句：「千磨萬擊還堅韌，任爾東南西北風。」竹變成是他人格的寫照，佇茲，竹代表品節。

就現實面來講，食的方面，竹有竹筍可（ho2）食，衣的方面，竹有竹笠可戴，住的方面，竹有竹屋可住，行的方面，竹有竹箄（tek4-pai5：竹筏）可划（ko3）。

總講一句，竹是一種高尚的物件，是一種實惠的物件。

近來台中市舉辦竹筍文化嘉年華會，公然以穿比基尼的美女做餐盤，將冷筍沙拉抗諸（khng3-ti7：放在）美女重要的部位，然後請貴賓取用，咱實在不知主辦單位頭殼想啥，敢講焉爾會當顯現「竹」高尚的文化意涵，我看這不單有夠離經，而且若像窮體（keng5-the2：使之出糗）台中市，提醒大家，台中市是色情發達的都市。

若講這是某一間飯店私辦的促銷活動，生理步數嘛，看過便算了。若公辦的活動是焉爾舞弄的，咱就有話講，尤其是台中市民，尹（in1：他們）益加有話講。

（作者是台語文字工作者）