〈手寫母語〉

中國野蠻醫生

■ 張復聚

根據瑞典人權調查報告，中國二○○五年對言論自由（包含網路言論）ê控制愈來愈ân（緊縮），判死刑ê人嘛愈來愈濟；閣卡恐怖ê是有寡法輪功學員受著足殘忍ê迫害：人猶活活被強迫抽血、甚至割器官賣錢；hö咱上未當接受、感覺上恐怖ê是參與ê人竟然嘛有醫生！這ê報導hö 阮足戇hgiáh（驚惶）、起kalún-sún（不寒而顫）、péng腹（反胃）想beh吐！真希望˜是真ê！

醫生ê任務是救人第一！準講佇戰場看著敵人著傷，嘛著先kä救命，救活才送軍事法庭審判。若真正有醫生為著beh趁錢läm-sám做（無所不為），後擺被送入手術房ê人著足細膩（小心），因為盲腸炎患者有可能beh入去手術盲腸，出來ê時連腰子（腎臟）嘛hö人割去賣掉去lah! 若是真正按呢，以後連醫生家己ê性命安全嘛無保障！這敢是人ê社會？咱beh呼籲全聯合國及世界逐國醫藥機構徛出來大大譴責這款無人道、野蠻ê不幸事件，嘛嚴格監督中國對死刑犯屍體處理系統ê運作，閣卡希望有道德良心ê中國人民及醫生，作伙來防止類似事件。寄望中國政府深入調查這ê事件，依法處罰相關人員。

發展經濟，提升物質生活享受當然真要緊，同時嘛著尊重生命，維護人權，注重自然環境及生態ê平衡，成做“富而好禮”ê邦國，這才是真正ê“王道”精神！ （作者為高雄醫界聯盟會長）