一隻鳥仔哮救救

■ 李勤岸

台南縣新化鎮口碑國小已經有八十五冬歷史，因為學生人數siuⁿ 少， beh h 人併掉ah。

口碑國小kan-nā五十六個囡仔，若是加四個，六十個，就免併校。-koh 這個口碑國小一旦若無去，西拉雅（Siraya） 平埔族beh 繼續噶瑪蘭ê腳步， 成功復育母語文化成做台灣原住民 ê 向望， 馬上著幻滅。這個口碑國小，其實不只是一個小學， 伊是Siraya 平埔族ê 一個岫〔1〕， 當teh 孵卵 ê 岫，咱tsit-má kā thh-thh 掉， 鳥仔囝孵bē出來， Siraya 這隻鳥母穩當哮救救， 哀聲遍野， 規個嘉南平原lóng 會聽著阿立祖喉叫ê哭聲。

新化是Siraya 大目降社 ê 祖居地。 Taⁿ 大目降 ê 囝孫lóng 漢化lah， Siraya ê不孝囝孫lóng 認賊做父lah，tsit-má koh beh 反轉來 kā 唯一ê 火脈thún h hua，kā 唯一ê 岫 long hȱ 破， 害阿立祖變做一隻無岫ê孤鳥， tī 台灣南方曠野ê 天頂哀啼。

口碑國小kap 口碑教會這幾冬來成做Siraya 語言、文化復育ê 基地， 已經有編Siraya 基本語詞ê詞彙表， 有寫真濟〔2 〕Siraya ê 母語歌謠，有演出Siraya語ê聖經故事《挪亞方舟》。 當咱已經bē記得祖先， 已經安心過著漢化生活ê時陣， in tī hia teh 守護咱平埔文化 ê 一絲仔氣脈， tī hia teh 復育、傳承 Siraya 特有ê 山林文化。

四月十六復活節hit工，tī 口碑國小舉辦 「傳遞山村的喜帖共許一道春天的彩虹」。 呼籲台灣留h in 這個岫thang 繼續孵卵， 孵 Siraya 祖先 ê 夢，孵 Siraya囝孫 ê 虹。 In kā 這個卑微、哀傷 ê 祈求叫做「喜帖」！ 西拉雅故鄉ê台南縣政府， 恁kám真正忍心lòng破這個岫？ 拜託恁好心好行leh，留一個血脈h平埔族， kám 好？ （用聽ê請上網http：//203.64.42.21/TG/khinhoaN/index.htm ）

（作者為詩人、語言學家）

註：〔1 〕sīu, 巢 〔2〕 tsē, 多