訐譙佇心內

■ 高英男

有一擺，我ê大姊對美國（OHIO）轉來探親，我開車載伊去shopping。後來，去加油站加油。當伊看著油錶頂面所標示ê價數ê時，目睭煞轉大蕊起來，「台灣ê油chiah-n…h（這麼）貴喔？」伊續接koh講：「佇美國，政府真注重人民ê民生福利，所以佇美國，油、水、電攏真俗。」

無按算，「行政院放手，油價一次漲足！」媒體用真震撼ê大標題按呢刊。油價喝起著起。此擺油價ê波動，已經破十年來ê歷史紀錄啊！Kap同事teh開講ê時，大家哀哀叫，訐譙佇心內。「唉！到底此嘛是發生甚麼款代誌？甚麼攏起價，就是薪水縮（kiu）水，真正是烏天暗地。此款日子呣知beh按怎托（thuh）落去？油已經chiah（這麼）貴啊！一睏頭閣起兩元，用搶ê卡緊啦！beh驚死人呣才按呢！」咁講，做官ê攏呣知樣民間ê痛苦佇叼位？議論真講：干單無達到所按算ê利潤，就算了錢啊嗎？就準算是真正倒貼好啊，錢嘛是用佇咱台灣兩千三百萬人民ê身上，咁有算了？一句：「反應成本」，按呢咁是替人民設想、爭取福利所應該有ê態度kap做法？換話來講，政府ê政策kap人民ê期待，距離是若來若遠啊！為著潤，煞來失去民心、辜負民意，是賺？是了？我嘛m̄知！

雖罔心內真peh-pak（苦悶）、無ta-ôa（無可奈何），m̄閣日子嘛是著繼續過落去。設使，你問我對未來有甚麼看法？我干單ë-tàng（可以）kä你講：「beh食胡蠅著家己欱（hap；撲捉）！」 （作者為公務員）