|
|
|
＜桐花樹下＞台灣變面族
■陳寧貴
佇台灣係怒目金剛，
一過台灣海峽，
就變做低眉菩薩。
佇台灣惡形惡狀，
一到對岸，
就變做又乖又巧。
中秋月光曄曄，
佢等講台北月光係假介，
北京介月光正係真介。
這敢係硬頸台灣人作風？
變面像翻書恁遽，
係變分麼儕看？
台灣變面族講，
陳總統得人權獎係笑話，
台灣民主係笑話，
無成愛胡主席得人權獎正甘願？
逐儕知中國民主正係畫虎令！
台灣變面族分人利用，
自家得意洋洋打鑼抨鼓，
畀僥去國際做統戰門面，
佢等歡歡喜喜食嗟來食，
面紅耳赤轉來大展特展，
歕雞頦歕到功勞比天大，
狂聲同台灣人民講請放心，
佢等同對岸大箍商量好適，
歌照常唱舞照常跳，
毋使再愁黑水溝險惡，
兩岸永永遠遠和平囉。
實在係上夜想介千條路，
天光本本磨豆腐！
變面！變面！
無論汝等仰般會變，
台灣人民永永遠遠記得，
汝等介真面目！
註：
恁遽：如此快
麼儕：誰
大箍：箍，客音kiou，
領導人
（作者為客家詩人）
|
|
▲TOP
|
|
|
友善列印