〈沈默之聲〉李院長，毋通心慒慒

■林沈默

末世紀、暗嗦嗦，

知識份子閃避在角落。

李院長、真雞婆：

青瞑仔報國毋驚刀，

挺阿扁、國民黨偃互倒，

政黨輪替、社會提昇改造。

啥知死蛇活尾橫橫葛葛：

朝小野大爭議一波一波，

國會空轉、預算討無，

政府改革、歹行歹做，

百姓生活也無變卡好。

——新政五年，台灣直直墜落，

綠色執政共款無可奈何…

七月天、雲薄薄，

少年仔淋汗水拚聯考。

李院長，真雞婆：

開闢多元升學管道，

拚教改、用愛用心來做，

冊包壓力、欲互伊變攏無。

哪知教師一套家長一套：

放學了後補習班去報到，

英語、數學、才藝科，

項項要補、項項要學，

白老鼠逼到流屎流膏。

——教改十年，信心年年失落，

讀冊囡仔猶原是無快樂…

政改難免跋倒、

教改要閣檢討、

李院長，毋通失志心慒慒：

知識良心是社會光明燈，

請你繼續發光繼續雞婆！

註

李院長指中研院院長李遠哲。

毋（ 台音m） 通， 不要。

偃（ㄧㄢ）互倒，將...推倒。

死蛇活尾橫橫葛葛（ㄍ ㄜˇ） ， 喻死而不僵、繼 續糾纏之意。

讀冊囡仔，指學童。

跋（•ㄅㄨㄚ）倒，跌倒。

（ 作者為本土詩人， 專事「台灣唸謠」創作）