〈桐花樹下〉台灣人民

■陳寧貴

扁政府執政五年，

既經變到有心無力，

分人批評淨賸一張嘴，

無法度扶正，

台灣傾斜中國氣氛，

乜無法度清理，

台灣知識份子恐共心態，

投機份子遽遽兩岸走，

台灣資源漸漸流去大陸，

自家利益行上前，

食水毋再念水源頭！

盡多台灣人，

失忒信心同理想，

坐困愁城食老本過日。

台灣仰會變到恁樣？

台灣天光日會過好麼？

台灣地基分親中大水，

透年月日慢慢沖刷，

台灣人民再毋勇敢企出來，

台灣有一日欲崩忒無？

呼籲扁政府，

台灣前途佇汝手中，

有權毋用或毋曉得用，

係害衰台灣人民，

扁政府愛堅持護台原則，

企穩該硬就硬立場，

任何人做毋得超過紅線，

超過就嚴法辦理，

今晡日台灣風狂雨急，

扁政府啊扁政府，

請認清楚和解共生，

做毋得和解亂生！

恁樣期待介台灣人民，

天光日正會過好啊！

註

淨賸：衹剩

仰會：怎麼會

天光日：明天

今晡日：今天

做毋得：不可以

恁樣：如此

（作者為客家詩人）