台灣民主

■陳寧貴

有人顛倒狺狺吠，

台灣民主係「民粹」；

有人濫糝咩咩詈，

台灣民主係「笑話」。

人無理講橫話，

牛無力拖橫耙，

台灣民主做麼介恁衰過？

愛分人無刮無捨亂糟蹋！

安居佇台灣介人民，

最瞭解台灣民主，

佇這位每一分鐘，

每一儕人都係自由也，

恁樣民主介地方，

全世界汝愛去奈尋？

盡僥挑事人，

佇台灣享受台灣民主，

仰反過來咬傷自家阿姆！

佢兜佇台灣講到中國，

口瀾波湃樣樣好；

去大陸熱嘴堵到冷勢窟，

盡採喊反台獨巴結阿共仔，

毋聲無聲，開聲破甕！

民主！民主！

佇台灣落難，

希望全世界民主國，

共下企亢來，騰手保護！

騰手保護！

※註：

恁衰過： 這麼可憐

無刮無捨：受冤屈無處訴

愛去奈尋： 要去哪裡找

盡僥挑事 ： 居心叵測任意批評

共下企亢來：亢hong ， 一起站起來

騰手： 騰 ten ， 協助

（作者為客家詩人）