勇敢台灣人

■ 陳寧貴

台灣人好種草，

係地球項最勇敢介人，

毋驚對岸七百零粒飛彈，

逐儕平常心，能食能睡，

乜還能盡暢唱歌。

下把會寂寞，

就用畫符誥新聞來治療；

下把睡毋落覺，

就看歕雞胲節目來催眠。

我兜已經慣勢，

認為飛彈有目珠，

毋會攻擊善良介台灣人。

盡早就罔記得，

開台祖遽遽揮別虛幻原鄉，

流血汗泅過烏水溝介驚險。

這滿加勢發夢對岸，

係錢淹腳目介桃花源。

哀哉！勇敢台灣人！

目毋要睡過頭，

再睡，台灣就分人搣走咧！

※註：

種草：血統

逐儕：大家

畫符誥：喻無厘頭

下把：有時候

乜：mei，而且

慣勢：習慣

這滿加勢：現在更加

（作者為客家詩人）