政客瀉衰人

■陳寧貴

佢兜盡像，

毋驚抗生素介病毒，

囥佇打鬥敘電視節目底背，

逐暗晡擘開大嗄嘛胲，

歕出黃河長江，

適天頂來介真理。

佢兜企高高，惦惦收錄，

群眾鬧嘎嘎介手啪聲，

做佢兜臨睡前介安魂曲。

佢兜慣勢佇群眾目珠肚，

盡沙鼻讀奇幻小說樣，

讀自家偽善膨脹介身影。

佢兜加勢拗蠻，

講別儕介民意係民粹，

自家介民意正係民主，

乜敢無面無皮，

打造自家金鬧鬧圓身，

分佢兜迷信介徒子徒孫，

將佢兜拜耶成，

法力無邊救苦救難大神！

政客！政客！

有勢毋好盡行，

有力毋好盡撐，

朋友親，斤換斤，

毋莫閣再瀉衰台灣人！

註：

瀉衰人：搞壞政局令人蒙羞

底背：裡面

適：從

逐暗晡：每天晚上

嗄嘛胲：喉嚨

朋友親斤換斤：客諺，彼此真誠相待之意

（作者為客家詩人）