沈默之聲--狗牌當金牌

■林沈默

佇威權年代，

咱是乖乖的憨奴才。

叫往東、不趕走西，

叫跪咧、不敢起來。

咱咬菜餔根切豬菜，

咱無錢凊採自卑打拚，

有時半路不敢認阿娘，

央望有一工自由自在，

蕃薯出頭做主宰：

彼時陣真悲哀，

咱的頷滾掛狗牌…

佇開放年代，

咱是怪怪的錢奴才。

台灣製、紅遍世界，

台灣錢、淹過肚臍。

台灣人有光彩舞台，

不過，爛性猶原無改，

臭香文化捧來烏白拜，

凊凊採採甘願去呷屎，

台客可憐裝可愛：

狗牌當作金牌，

掛咧身軀叮噹甩…

乖乖、乖乖乖…

怪怪、怪怪怪…

※注：「七月半鴨、不知死活。」，一九五六年國府推行國語運動，校園禁講方言，否則罰款掛狗牌，開啟文化歧視與族群自卑濫觴。數十年後，在商業及媒體加持下，部分被壓迫者變成膨風水雞，竟拿著似是而非的「土產」強迫推銷。台客爭議，難脫菁英與通俗的階級文化鬥爭，但演藝買辦假戲真做，將次文化膨脹成台灣主體價值來牟利，讓台灣人揹上永遠的狗牌，最該撻伐。（作者為本土詩人，專事「台灣唸謠」創作）