桐花樹下--台灣禿鷹

■陳寧貴

講到台灣股市，

天就會暗一片，

無論係基本面技術面，

抑係消息面籌碼面，

堵到天頂禿鷹，

佈下介內線交易天羅地網，

四大看盤面全部失效，

散戶輸到叫毋出目汁，

唉喔，真沒天良！

講到台灣職棒，

棒球迷就會痛心腸，

聽講有球員：

收組頭賄款接受花酒招待，

食甜飲辣後放水打假球。

根本沒半息運動精神，

仰會做出恁樣，

沒公平正義介詐欺行為？

唉喔，真夭壽！

講到台灣政客，

台灣人就會捶心肝，

佢等見人講人話見鬼講鬼話，

良心道德豁一片，

自家名利放蒂中，

僥想左右開弓，

想愛兩岸通吃，

密會大陸領導人，

會談內容無人知，

這係極惡介內線交易，

無成愛將台灣人民，

變做股市散戶？

唉喔，真孤耄！

註：

抑係：或是

堵到：遇到

仰會：怎會

恁樣：如此

豁一片： 丟一邊

蒂中：中間

無成：難道

（作者為客家詩人）