〈桐花樹下〉台灣輔娘

■陳寧貴

妻子客家話又安做輔娘，

頭擺農業時代，

輔娘蒔田挲草割禾，

渡大渡小蓄雞蓄鴨，

做粄煮食樣樣精通；

乜會裁會剪會繡花，

會籌會算會當家。

到現下工業社會，

輔娘無閒灶下事情後，

又遽遽去工廠做事，

賺多賺少騰手家庭經濟；

有兜去大公司做總經理，

運轉公司到世界出名；

有兜輔娘自家創業，

輒常事業發展到男人跈毋到。

恁湛介台灣輔娘，

實在得人惜，

實在分人盡佩服！

仰會有時節發生家暴案？

百年修得共下打拚這生人，

夫妻定著愛互尊相敬，

老公乜愛做，

當湛台灣男子漢！

註：

安做：稱做

頭擺：從前

渡大渡小：養兒育女

乜會：也會

跈毋到：跟不上

恁湛：如此好

仰會：怎會

（作者為客家詩人）