牽一條保護台灣的城

☉林央敏

　 一九四七年的二二八
　 位中國來的烏色政權跨過烏水溝
　 用槍籽給美麗島磅甲流血流滴
　 傷痕累累的台灣被嵌一重生驚的布
　 驚破膽的老百姓開始有耳無嘴
　 台灣魂慢慢失去元氣
　 台灣人只有暗暗療傷，偷偷醫治
　 一步一步踏著祖先留落來的腳印
　 感受著這些沉重的腳印，
　 是用血汗做印色所當出來的日子
　 一年一年，台灣人漸漸覺醒
　 美麗島才擱徛起

　 誰知，五十年後
　 彼個烏色集團的兄弟
　 紅色政權也數想跨過烏水溝
　 同時暗中將飛彈密密佈置
　 為烏色集團恐嚇台灣的功力加持
　 怹嘴相連，做夥給戰爭喝甲誠大聲
　 想欲一句話就給台灣魂壓死

　 不過，二○○四年的二二八
　 台灣南北百萬粒心肝
　 是千千萬萬的我佮你
　 是千千萬萬的你佮伊
　 攏有同款的意志
　 咱用勇氣做成磚仔角
　 咱用熱情做成紅毛土
　 咱用決心做成鋼鐵枝
　 有力的手牽著溫暖的手
　 位和平牽來到建國
　 位恆春延長到幸福
　 位台灣頭鞏到台灣尾
　 鞏出一條自由民主的城牆
　 是保護台灣上強的武器

　 註：1.位，從、2.磅，爆擊、3.嵌，掩蓋、4.當，指蓋（印章）和典當雙關意、5.徛，站立、6.鞏，砌磚建造