買票的人 讓他落選

■楊振裕

進入民主新時代，

公平競選是應該；

有人買票心肝歹，

啥物齣頭攏做得來：

縛柱仔腳、發行路工，

招待遊覽閣兼摸彩，

手段卑鄙足厲害！

賣票的鄉親

實在是大戇呆，

人格受辱猶毋知，

有一工乎人騙去殺，

才來後悔著悲哀！

買票的人若選贏，

選前的承諾欲算啥？

為民服務真好聽，

選後變做虛假的幻影！

有利頭，伊搶第一名，

爭取建設閣拚性命，

毋閣聽講 -

工程著愛抽三成?!

這款人若乎做議員，

社會風氣那袂亂？

烏金勾結無人管，

亂舞一場，

真正不成蒜！

民主開放的台灣，

選民智識攏真高，

目睭擘金、想乎周全，

選出上好的人選！

買票的人眾人怨，

咱著發揮神聖的民權，

乎伊選輸倒咧喘！

民主政治第一關，

全民做伙掠賄選！

買票的人是罪犯，

請逐家拍拚鬥宣傳！

勇敢檢舉、理性判斷，

乎買票的人

全部落選！

乎台灣成做

民主的典範！

（作者楊振裕╱彰化縣育新國小校長）